၁၄ ၊ ၈ ၊ ၂၀၂၅ ။
ခေတ်ဟန်ႏနီꩻယိုခါ ကအဝ်ႏထွာပြောင်ꩻလုဲင်ႏဖန်ဆင်ꩻလွေꩻဒါႏ ပါꩻသီးထာꩻဒါႏ ပါꩻသီးထာꩻသေအနယ်ꩻအမျိုꩻမျိုꩻ ကအဝ်ႏတိုꩻငါငါ ထွာထဲင်းတောဒါႏ တမျိုꩻထွူတမျိုꩻ တစားထွူတစားသူꩻနဝ်ꩻ အံႏဖြာႏလဲင်ꩻသူႏသေနေးဒွုမ် အဝ်ႏခန်းဖြာꩻလုဲင်ဒုံ အုံခန်းဖြာꩻလုဲင်ခမ်းရိုꩻလဲ့ တွမ်ႏမဲ့အာႏရွုံႏပေႏတစွုံႏယို ထွားယဲက်လို့ဝင်ꩻလောင်းလွိုး မာꩻငေါဝ်းဒေါ့ꩻပဆိုးလဲ့ လဲင်ꩻလꩻနေးစွဥ်ႏနုဲင်းယိုစားတန်နောဝ်ꩻ ပါꩻသီးထာꩻယူႏ၊ထာꩻဒါႏ၊အနယ်ႏပညာႏစွန်ꩻအာႏဒျာႏလွဥ်းလွဥ်းကရိုꩻနဝ်ꩻ မဲ့ထီႏလွဥ်ꩻ နားဟွိုန်ထွꩻဒျာႏပငါပရာꩻဖုံႏသွူ။
နီသွဥ်းသီးပအိုဝ်ႏဖုံႏ ဟန်ႏနီꩻယိုရင်ꩻ ထွိုင်ႏထီႏခံႏစာꩻ ခွုမ်စံႏလွဥ်ꩻဗာႏပါꩻသီးအနယ်ꩻပညာႏခြွိုင်းခြွိုꩻယို ထီႏသေဗာႏ ဟွိုန်ဗာႏထဲင်းထဲင်း ခွိုꩻမျိုꩻလောင်ꩻလင်သီးယိုꩻယာႏ ထွုံꩻစံႏတွမ်ႏ ဖဝအုံအဝ်ႏရေꩻဖုံႏနုဲင်းနဝ်ꩻဟောင်း ထီႏထီႏဒျာႏပအိုဝ်ႏရပ်ရာႏ ယဒုံဒုံ ယဖြာꩻဖြာꩻနဝ်ꩻ ပါꩻသီးအထွုံꩻအကျင်ꩻ ဗွို့ꩻသော့ꩻကူꩻလင်ꩻလဲဥ်း သွီႏယာႏအခါႏ သꩻရာႏအကို တနီꩻတမျိုꩻမျိုꩻ တဟာတစားစား ပါꩻသီးတယောင်ႏဗာႏတဝ်းလဲ့ သꩻမဲဥ်နုဲင်းဝင်ꩻတွော့ꩻ နမ်းတဲ့ရုဲင်းလင်ꩻလွေꩻစွဥ်ႏ ပါꩻသီးအကျင်ꩻထွုံꩻဖုံႏ အဝ်ႏထီႏလွဥ်ဗာႏလဲဥ်း နီပအိုဝ်ႏဖုံႏအခါႏကိုသွူ။
အကျင်ꩻတဟဝ်တဝ်း ထွိုင်ႏလွဥ်ဝွို့ ကဖွို့သော့ꩻလဲဥ်း သွီႏယာႏခါႏ အဝ်ႏခံလဲဥ်းသꩻရာႏကို လိုꩻပေႏနုဲင်းနဝ်ꩻစား မွိုးငဝ်းဆွုံꩻမꩻအွဥ်ႏကုဲင်ချာ ဖာသီးအကျင်ꩻဟဝ်အွဥ်ႏကုဲင်ပြာႏ ရွိုင်ꩻသꩻတဏှာႏတွမ်ႏ နေးရွဥ်စွန်ꩻအာႏ အွဥ်ႏထင်ႏဆꩻငါ တောႏလမ်းထာꩻနဝ်ꩻ လဲင်ꩻအဝ်ႏပါစွဥ်ႏ မာတန် မာပေႏ ၊ ဝါꩻတန် ဝါꩻပေႏ ၊ ယဟန်ႏလဲ့ ထွားအာ ဝင်ꩻခမ်းလင်ဇတ်ကာꩻမကောင် ပွယ်ꩻစေနိန်းယာ တမာꩻဗာႏထွာဒွိုန်းလဲ့ အုံငီꩻရီးလဲဥ်းဝင်ꩻ ထွုံꩻအကျင်ꩻယိုစားလဲ့ နီပအိုဝ်ႏခြာ အဝ်ႏထီႏဟွိုန်ထွꩻဗာႏလဲဥ်းသွူ။
ယဖြာꩻဖြာꩻနဝ်ꩻ ထုမ်ႏထာꩻပျောႏ လောႏထာꩻသွင်ႏ ခိုဗင်ႏမူႏနမ်ꩻစထွာ အရသာႏတရီတွမ်ႏအခါႏ အဆျာႏတွမ်ႏအနွိုး ပွိုးသꩻမဲဥ်သေရောင် ဒုံသောင်ထာꩻပုံဗꩻ လမ်းထျꩻခင်ႏလမ်းဖုဲင်ႏ နုဲင်းစွဥ်ႏHotelခန်ꩻ အုံငီꩻဝင်ꩻစားနဝ်ꩻလဲ့ အဝ်ႏထွာအာလွဥ်လဲဥ်းသွူ။
မဥ်ႏသွုံꩻအနယ်ꩻပညာႏ ကလꩻအီနွောင်ꩻဒါႏ နမ်းအကျိုꩻ ဒုံတာႏယမ်လိုꩻ ခွိုꩻတာႏအာႏကွိုꩻအနယ်ꩻမျိုꩻဖုံႏယို အဝ်ႏလိုႏသေထွားသွဥ်နုဲင်းငါႏနဝ်ꩻ
ကျိုꩻစာꩻ တသေထွားတဝ်း တကျင်ꩻသွုံႏတဝ်း၊
ထွေလွဥ်ꩻဒျာႏအကျင်ꩻ မာꩻကုဲင်ဒုံတရေႏ အကျင်ꩻမာꩻပေႏ မွိုးမဲ့ငါ အကျင်ꩻမာꩻဆာ ဖာသွိုန်ႏသꩻစားယိုနဝ် ပီဒျာႏထာꩻသားခင်ႏလစ်ꩻဒဲင်နယ်ꩻဖုံႏလွုမ်ꩻသွူ။
ကွပ်နဝ်ꩻမꩻ သွုံꩻဝင်ꩻအနယ်ႏပညာႏ ကထွားဒါႏ Social media ယို ယမ်ကလꩻနွောင်ꩻအီ နမ်းအကျိုꩻဟဝ် ဖေႏကဗꩻငါအရန်းထိုအတာႏ အဝ်ႏလိုႏသွုံꩻဒါႏဒါႏငါႏသွူ။
