စက်တင်ဘာ (၂)နီꩻ၊ ၂၀၂၅၊ တောင်ႏကီꩻ
ပအိုဝ်ႏစွိုးခွိုꩻအစွိုꩻ(PNO)ပါတီ ဗဟိုႏထာꩻမာꩻအမုꩻဆောင်ႏစွိုꩻ ပွယ်ꩻအုံကွံယို မာꩻလွေꩻ မဟာနီꩻ ဩဂတ်လာ ၆ နီꩻ၊ မွူးနီꩻ စနေႏ၊ ဝေင်ꩻတောင်ႏကီꩻ၊ ပအိုဝ်ႏစွိုးခွိုꩻအစွိုꩻ(PNO)ပါတီ၊ ဗဟိုႏဌာႏနချွုတ်ရွုမ်ꩻကိုအကျောင်ꩻ သေထွꩻဗာႏနောဝ်ꩻသွူ။
မဟာနီꩻ ကမာꩻလွေꩻဒါႏ ဗဟိုႏထာꩻမာꩻအမုꩻဆောင်ႏစွိုꩻ ပွယ်ꩻအုံကွံကိုယို အုံကွံတွိုင်ႏပင်ႏလွေꩻဝင်ꩻ
ကအီႏဒင်ႏသွင်လွေꩻဒါႏ လွတ်တောႏနမ်းခြောင်တင်ကိစ္စဖုံႏ၊ ကအီႏနွို့ခေးပြဲင်ႏလွေꩻဒါႏ မဲဆန္ဒနယ်ႏကိစ္စဖုံႏ၊ ကအီႏမာꩻလွေꩻဒါႏ ထွို့ꩻဗူႏရေꩻကိစ္စဖုံႏ၊ ၂၀၂၅ လွိုက်ရွေꩻပွယ်ꩻအကို ကအီႏကျင်ꩻသွုံꩻလွေꩻဒါႏ အနယ်ꩻတသာ FPTP ကရိုꩻဒါႏ နွောင်ꩻသားလꩻလို့စနစ်တွမ်ႏ PR ကရိုꩻဒါႏ လꩻထာဝနေးဝင်ꩻ(အချိုးကျ)စနစ်ကိစ္စဖုံႏ၊ သတ္တမအလဲင်ႏ ကအီႏမာꩻလွေꩻဒါႏ စွိုးခွိုꩻညီႏလာႏခံႏကိစ္စဖုံႏ၊ ၂၀၂၅ လွိုက်ရွေꩻပွယ်ꩻကိစ္စဖုံႏ၊ ကမွဥ်းဖျင်ထဲမ်လွေꩻယင်းဒါႏ PNO ပါတီꩻ မူဝါဒကိစ္စဖုံႏတွမ်ႏ ကအီႏမာꩻလွေꩻယင်းဒါႏ ဗဟိုႏကောႏမတီႏစွိုꩻ ပွယ်ꩻအုံကွံကိစ္စဖုံႏအကျောင်ꩻ သေထွꩻဗာႏနောဝ်ꩻသွူ။
ပွယ်ꩻအုံကွံကို ပအိုဝ်ႏစွိုးခွိုꩻအစွိုꩻ(PNO)ပါတီ နာယက ဖြားပီတာထွန်းနိုင်၊ ဖြားခွန်ချစ်မောင်၊ ဥက္ကဌ ဖြားခွန်စံလွင်၊ ဒု -ဥက္ကဌဖြားခွန်ဝင်းကို၊ ဖြားခွန်မောင်သောင်း၊ အွဥ်အကိုရေꩻချွုတ်ဖြားခွန်သိန်းဖေ တွမ်ႏ အွဥ်အကိုရေꩻစွိုꩻဖုံႏ၊ ဗဟိုႏထာꩻမာꩻအမုꩻဆောင်ႏအစွိုꩻနွို့ဖုံႏ ကျွထင်ႏလွဥ် (၄၀)ဖြာꩻအကျောင်ꩻ သေထွꩻဗာႏနောဝ်ꩻသွူ။
