အမျိုꩻမဥ်ႏစဲစ်မꩻ ရက်ချာမျိုꩻ..

နင်ꩻဥမ္မာ ငဝ်းငွါ(၈)

အမျိုꩻမဥ်ႏစဲစ်မꩻ ရက်ချာမျိုꩻ..

နီပအိုဝ်ႏလိုꩻမျိုꩻယို လိုꩻဖြာꩻခြွဥ်းတဲ့အာ အစွိုꩻပေါင်ꩻတဲ့အာ စူခွုမ်သားတဲ့အာတန်ဒျာႏသွူ တွော့ꩻနီလိုꩻမျိုꩻဟံႏနယ်ႏခင်ႏလမ်းဖုံႏယို ဖေႏကလꩻနုဲင်းဝင်ꩻ ဖေႏကထွာတရာꩻဝင်ႏနဝ်ꩻ အဝ်ႏPNOကျိုꩻစာꩻတွူႏတရန် ခံႏအနစ်နာႏထူႏဖေႏငိမ်ꩻချမ်ꩻရေꩻတဲင် လꩻအထူႏဒေႏသ၆တွမ်ႏ ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻဒေႏသလွုမ်ꩻသွူ..

ထွိုင်ႏလꩻအထူႏဒေႏသ(၆)တွမ်ႏ ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻဒေႏသမꩻ နီပအိုဝ်ႏလိုꩻမျိုꩻခင်ႏလမ်းအုံတရာꩻဝင်ႏ ယီးနယ်ခရာႏအဝ်ႏတဲင် မဲ့ငါပေႏဗာႏတဝ်းရိုꩻဗာႏနဝ်ꩻသွူ..

ယီးနယ်ခရာႏခင်ႏလမ်းအဝ်ႏလဲဥ်းတဲ့ ဖေႏကအဝ်ႏသေႏသေႏဖေႏကတိဥ်ႏခွေါင်လꩻ မာꩻပဲင်ႏခွင်ꩻဖုံႏတဲ့ဖေႏကလꩻပါလို့ယင်းနဝ်ꩻ လိုႏကျိုꩻစာꩻထဲင်းငါႏသွူ..

နီလိုꩻမျိုꩻကလꩻဒါႏအထူႏဒေႏသ(၆)ယို အဝ်ႏဒျာႏဖူးဝေးဖြဝ်ꩻ မန်း ပတောင်ႏဖုံႏအခါႏတဲင် အုံအဝ်ႏဒါႏဒါႏဗာႏထာꩻသွူ နီအထူႏဒေႏသ(၆) ဖေႏကငိမ်ꩻချမ်ꩻစွူစွူ စဲ့ꩻဘေꩻစဲ့ꩻတံႏဖေႏကခံႏဗာႏမွော့ စဲ့ꩻပွဲꩻဖေႏကထွာသော့ꩻမွော့နဝ်ꩻ ရဲးကမ်းကာႏကွဲႏဗာႏ ခြိ့ꩻထူႏဗာႏသွူ..

ဖူးဝေးစဲ့ꩻဖြဝ်ꩻနီစွိုꩻ စဲ့ꩻဝဖုံႏနဝ်ꩻ စဲ့ꩻပွဲꩻဖေႏကထွာမွော့တဲ့ ဒေါ့ꩻရီအဝ်ႏယို ခြိ့ꩻထူႏအဝ်ႏလꩻနေက တွိုႏဒျာႏပအိုဝ်ႏချင်ꩻချင်ꩻသူရိန်(စဲ့ꩻနျာႏ)စွိုꩻနဝ်ꩻ ခင်ႏလမ်းအုံအဲဥ်ထဝ်းPNOဖေႏ ဒဲဥ်အံႏအဲဥ်ထဝ်းခမ်းသားဖေႏလဲဥ်းသွူတဲ့ ဟဲ့ꩻလွဥ်နေကပတောင်ႏKNDF ဟဲ့ꩻပါမန်းPDF ပဥ်စွိုꩻစွိုꩻပဥ်ဖုံႏဖုံႏ အွဥ်လဲ့ꩻကြုံႏပအိုဝ်ႏဒုံ အွဥ်ဖုံပဲစ်စွဥ်ႏသီႏသဲင်ႏဝေင်ꩻသွူ..

ခါးလားကထွာနေးယို သူရိန်(စဲ့ꩻနျာႏ)နမ်းကိုႏတဲင်ႏအာႏမခံႏနေက ပတောင်ႏနဝ်ꩻဝွေꩻပဲင်ႏဒျာႏ စဲ့ꩻပွဲꩻဖေႏကထွာမွော့ပအိုဝ်ႏခြာတဲ့ အာႏမခံႏဒျာႏရိုꩻနဝ်ꩻသွူ..

နီဗွေႏဗွန်တန်သီႏသဲင်ႏတဲ့ မေတ္တာႏရပ်ခံႏ နီပအိုဝ်ႏဗွေႏသံႏဃာႏတဲ့ မေတ္တာႏရပ်ခံႏ နီပအိုဝ်ႏခမ်းသားမွိုးဖာတဲ့ မေတ္တာႏရပ်ခံႏ လုံးဝနာႏခံႏတဝ်းလာꩻလာꩻ နာႏဒျာႏပတောင်ႏငဝ်း သစ္စာႏအွဥ်ႏဒျာႏNUGတဲင် ပအိုဝ်ႏခမ်းသားမွိုးဖာဖုံႏတဲ့ ငွိုးဗာႏစွဥ်ႏထာꩻ လွင်းခေ့ꩻလွင်းနာꩻဗာႏစွဥ်ႏဒျာႏ ကာꩻအဲဥ်ထဝ်းသားတဲ့လွေꩻခင်ႏဗာႏနေးစွဥ်ႏသွူ..

ထွိုင်ႏမော့ꩻစဲ့ꩻဘေꩻတံႏနဝ်ꩻ အုံအဝ်ႏခရာႏတဲ့ယပ်ꩻ အံႏအွꩻခရာႏဖုံႏတဲ့ယပ်ꩻ ယပ်ꩻလို့ယပ်ꩻစင်စွဥ်ႏတဲ့ သူရိန်(စဲ့ꩻနျာႏ)သီးစွိုꩻ တွမ်ႏရိုꩻမွော့အီႏကူႏညီႏ အဝ်ႏကွီလွဥ်ꩻနေးကခမ်းသားရွဥ်သွူ..

တွိုႏဒျာႏစဲ့ꩻပတောင်ႏမွိုးဖာဖူးဝေးမော့ꩻစဲ့ꩻဘေꩻလွင်းစဲ့ꩻတံႏနဝ်ꩻ ဖေႏနေးPNOကလက်ခံႏဒေါ့ꩻကူꩻစွိုးစွိုး ဖေႏနေးပအိုဝ်ႏခမ်းသားကလူႏကထောက်ပံးတဲ့ဒေါ့ꩻအမျိုꩻမျိုꩻ အနမ်းကိုႏတဲင်ႏတဲ့ကူႏညီႏမွေးနေးစွဥ်ႏအလဲင်ႏလဲင်ႏအခြိုက်ခြိုက် ငမ်းငါႏအဆင်ႏပြေႏတဝ်းတဲ့ကေႏညာႏနေးစွဥ်ႏကမ္ဘာႏလောင်း လူႏခံႏပါစွဥ်ႏလိုꩻခမ်းလင်ဖုံႏသွူ..

ယူႏစံꩻမွိုင် ပအိုဝ်ႏခမ်းသားကဟဝ်ဖေႏတတွာနဝ်ꩻ PNOကရက် PNOကသꩻညင်ꩻ PNOကခွင်ꩻဖေႏအစားစားတဲ့ အဝ်ႏမာꩻလꩻနေးကယိုစားနဝ်ꩻ ယူႏလွစ်ဖြောင်စွဥ်ႏသွူ..

မဥ်ႏအွဥ်ႏစွꩻစွူစွူ မဥ်ႏခွင်ꩻဖေႏထဲင်းထဲင်းနဝ်ꩻ ငမ်းယင်းငါႏဒုံကုဲင် ဝေင်ꩻပဲစ် ခမ်းသားမွိုးဖာဖုံႏထိုꩻခေ့ꩻထိုꩻနာꩻဗာႏထာꩻတဲင် ယိုခါPNOအဝ်ႏအွဥ်ႏသဲင်ꩻအုံချာ အခင်ႏလမ်းကတူႏတန် အွဥ်ႏသဲင်ꩻမာꩻတိုꩻတက် မာꩻသာႏယာႏချာအခင်ႏလမ်းနဝ်ꩻ တမဲဥ်သဲင်ꩻရောင်တဝ်းဒွိုန်းတဲင် PNOအဝ်ႏလောက်သဲင်ꩻဖေႏနေးသွူ..

မဥ်ႏဒေါ့ꩻဗာႏစွဥ်ႏစွဥ်ႏ သူရိန်စွိုꩻယို လိုꩻလွင်းအမုသားဖုံႏအာႏ ယဟန်ႏသားနဝ်ꩻထူႏဝင်ꩻရွဥ်ဖေႏချာနွောင်ꩻတဝ်းတွော့ꩻ လွေꩻထေ့ ယဟန်ႏသားနဝ်ꩻပဲစ်ဝင်ꩻပိုမာတွော့ꩻ လွေꩻထေ့ ယဟန်ႏသားနဝ်ꩻတခွန်ꩻစွန်ထာꩻတွော့ꩻ လွေꩻထေ့ ယဟန်ႏသားနဝ်ꩻကူꩻကားယာဗွာယာမတွော့ꩻ လွေꩻထေ့ လိုꩻမာꩻထာꩻမာꩻတဟဝ်တဝ်းဖုံႏနဝ်ꩻ လွေꩻထေ့ရောင်နဝ်ꩻကိုသွူ..

နဝ်ꩻလွုမ်ꩻကာႏတဝ်း နုဲင်းယိုခါပတောင်ႏဖုံႏကွဲးအာအာသဲင်ꩻ ကမာꩻထာꩻမာꩻဖုံႏတဲ့ ပအိုဝ်ႏတာႏတပါတဝ်း ပအိုဝ်ႏခမ်းသားမွိုးဖာတာႏတဲ့တပါတဝ်း အဝ်ႏဒျာႏသူရိန်နမ်းတာႏ ပတောင်ႏတာႏ NUGတာႏ PDFတာႏလွုမ်ꩻတဲင် ပအိုဝ်ႏခမ်းသားမွိုဖာဖုံႏတဲ့ဟဝ်ဖေႏအာႏထဲင်းတဝ်းဒွုမ် ပအိုဝ်ႏပေႏကအဝ်ႏသော့ꩻဒါႏနဝ်ꩻကိုသားဖုံႏတဲ့ ဟဝ်သဲင်ꩻထေ့ချာငါႏလဲဥ်းမွိုးဖာဖူးဝေးထျꩻသွူသြ…
ဖြားကံႏ နောင်ထောဝ်