စင်းသင်းကောင်ခယ်ႏ၊ ရွမ်ဖြုဲင်ꩻ၊ စက်တင်ဘာ (၂၁)နီꩻ၊ ၂၀၂၅
ခွိင်ႏဝွိတွမ်ႏ ခေတ်ကာလအလꩻ အခေႏခံႏပညာႏအာႏပေႏထိုလဲဥ်း ခင်ႏလမ်းတွိင်ꩻ အဖဲ့ꩻဖဲ့ꩻကဆွုꩻဖျတ်နွောင်ꩻဒါႏနဝ်ꩻ အောဝ်ႏပညာႏလွုမ်ꩻ သေထွိက်သေသင်ꩻဖေႏနေႏကသေ ဖေႏကသွုပ်ငါနွောင်ꩻတာႏလဲ့ အခေႏခံႏပညာႏယိုအရေꩻကီနေနေ ကွပ်ပွိႏလိုꩻတစ်စု ထီႏတောႏအနမ်ႏစီꩻပွာꩻရေꩻမကောင်း နာႏလိုႏတဝ်းပညာႏဒါႏသား အာမကောင်ႏတဲ့သူသေဒွုမ် နီဒေႏသကို ပညာႏရေꩻတဲ့ထွာထိုဗာႏအပြောင်ꩻအလုဲင်ႏ သွူ
ယိုခါနဝ်ခေတ်ကာလတဗာႏအလꩻ ဆရာႏ ဆရာႏမူႏလဲ့ကွဲႏ အောဝ်းဆေ့သဲင်ꩻလဲဥ်းစွုမ်ႏနေင်ႏနေင်ႏ ဝါႏသနာႏတွော့မာꩻသာႏတဲ့အဝ်ႏ လဲ့လွစ်တောဝ်း အံႏအွတွက်တာႏဖေႏကမ်းတွော့နွိမာꩻဆောင်ႏတဲ့အဝ်ႏ /ကွပ်ပွိႏ ထာꩻလိုႏနဝ်ꩻ အာလဲဥ်ႏထာꩻလတဲင် လွူႏနမ်ႏမွီႏသက်ဖေႏနေႏကပြဲ့စွုႏတွော့ꩻ အလတာႏကလဆေ့ဒါႏ ဆရာႏ ဆရာႏမှုႏ အရန်ႏယိုတဲ့ အွဥ်ႏကုဲင် ထွုမ်ႏတောႏမာꩻတောႏ စီꩻပွာꩻရေꩻအလင် ယဟန်ႏသာႏတဲ့ထန်ႏလွေꩻခမ်းလင်နုဲင်ႏငံႏချာꩻသွူ
တဖူꩻလွေꩻသဲင်ꩻတယိုတဝ်း ကောင်လောင်ႏဆောင်ႏခြာ အခေႏခံႏပညာႏကျောင်ꩻလဲ့ တွိႏခြောင်ꩻမှုအဝ်ႏဒွုမ်သွူ ခေတ်လဲင်ႏခါဝေင်ꩻကို တမွေးတဝ်းတောကိုနောဝ်ꩻ ကျောင်ꩻသာႏတဲ့အဝ်ႏဒျာႏ ကဖေႏအပ်နွောင်ꩻ အီလွေꩻကျောင်ꩻတာႏတဲ့လဒျာႏ လိတ်သွဥ်ကျောင်ꩻတဲ့အဝ်ႏဒျာႏ တအဝ်ႏတဝ်းနောဝ်ꩻ ဆရာႏ ဆရာႏမူႏသွူ
၂၀၂၅−၂၀၂၆ ဗာႏ သွဥ်ပညာႏနေင်ႏ ဒုံလွိင်ကန် အခေႏခံႏပညာႏမူလွန်ကျောင်ꩻကို လိုꩻပေႏနဝ်အဝ်ႏ Grade1 to Grade8 အဖြာꩻပေါင်ꩻ ၁၆၆ ဖြာꩻသွူ လိုꩻပေႏပဥ် ၁၆၆ယို ဆရာႏမူႏအဝ်ႏညီကွိ ဝင်သွံ လွုမ်ꩻသွူ အဝ်ႏခွိင်ႏနဝ်ꩻလဲ့ သမ်းသွဥ်ဗာႏထဲင်ႏ ဘာႏသာႏပေါင်ꩻစွုမ်ႏတွော့ တွိႏခြောင်ꩻမှုအဝ်ႏတဝ်းသွူ အစိုꩻရကမတ်အွဥ်သေꩻရျာꩻခေါင်ꩻနဝ် ဆရာႏ ဆရာႏမှုႏတစ်ဖြာꩻယို ထိန်ꩻထွာႏဗာႏလိုꩻပေႏ ၂၀−၃၀ လွုမ်ꩻသွူ
ခေတ်လဲင်ႏခါ စွုမ်ႏရပ်စွုမ်ႏတဲ့ အဗွိန်နုဲင်ႏနီသွဥ်းသီႏကျောင်ꩻတဲ့ ထီႏဗာႏအာငါႏသွူ တွိႏခြောင်ꩻမှုတအဝ်ႏတဝ်း ပညာႏရေꩻယို တနီꩻခါ နီနာꩻအနာႏဂတ်တာႏ အီထွာꩻနဲင်ႏမုဲင်ꩻတဲ့ ပညာႏမိဥ်ꩻဆေ့မဲ့ ထာꩻလိမ္မာႏကွဲႏ ဆေ့ဒါႏသွူ
ဆရာႏ ဆရာႏမူႏသီႏဖဲ့လဲ့ ကလိုႏအပ်ဒါႏ စေႏတနာႏ ဝါႏသနာႏ အနစ်နာႏ သွဥ်သင်မှု မိဥ်ꩻအဝ်ႏ ဘာႏသာႏဆဲင်ႏရာꩻအထီအသွီႏ ဖေႏနေအရန်ႏကထိုထဲင်ႏလဲ့ အဝ်ႏလိုႏထဲမ်သွော့သေႏသေႏယင်းနဝ်ꩻမှ အကျိုꩻအီႏအာညီꩻဝင်ꩻသွူ အရေꩻကကီနဝ် ထွာဒျာႏဝေꩻသီႏဖုံႏယိုလဲ့ ဖေႏကထွာဒျာႏကျောင်ꩻသာႏသီႏ အွဥ်ဟိုထိုနာႏ စံႏနမူႏနာႏပြပုဂ္ဂိုလ်ႏသွူ
ယိုကိုနဝ် တွမ်ႏသဓာတ်ခွေါင်ခွေါင်တွော့ ကလိုႏအပ်ဒါႏဝီရိယအတွိင်ꩻ အဓိကနောဝ်ꩻ နီသွဥ်ႏသီႏကာႏကအဝ်ႏ ဖေႏကထွာမွော့ မောႏဟတန်အီ မောႏဟအွဥ်ရာထာခေ့တန်ကိုနဝ်အရေꩻတန်ငါႏသွူ
