နီကအဝ်ႏလိုꩻဒုံ နီကအုံလိုꩻခမ်းအကို နီလိုꩻသီးအတာႏ အခွေါင်ခံႏသွတ်ꩻစွန်ꩻအားနဝ်ꩻ အဝ်ႏလွောင်ႏဗူႏမုꩻပေါႏလွဥ် လွောင်ႏဗူႏမုꩻယိုထွာအထျꩻ အရင်ꩻခံႏ။
လိုꩻတဖြာꩻစီႏအနေႏ စွန်ꩻအာႏဖုံႏ အထီအသွီႏဖုံႏယိုနဝ်ꩻ Limit ကရိုꩻဒါႏ ပမာႏဏအကူအနားအဝ်ႏဒါႏရိုꩻကီလဲ့ အမျာꩻအာႏ အစွိုꩻအဗူႏအနေႏပေါင်ꩻစုလွောင်ႏဗူႏတွော့ꩻကထွာလွဥ်ဒါႏ စွန်ꩻအာႏနဝ်ꩻ အယပ်ꩻအခုဲင်ႏ အရဲအဆီꩻတန်ခန်းဝယဝ်း တွူႏတရန်ကာႏဖျတ်နွောင်ꩻအီစွဥ်ႏ။
နဝ်တွော့ꩻ လွောင်ႏဗူႏမုꩻအစဲစ်ကရိုꩻနဝ်ꩻနုဲင်းမုဲင်…??
တဖြာꩻတွမ်ႏတဖြာꩻ ထွားလွိုသွူဝင်ꩻတဲင် အချင်ꩻချင်ꩻ သွိုန်ႏသꩻသဘောႏတပီဗွိုန်တဝ်းဝင်ꩻ အအုံအအဝ်ႏ အဒေါ့ꩻအဖြဝ်ႏယိုစားနဝ်ꩻ လွောင်ႏဗူႏမုꩻတမွေးတဝ်း။
တဖြာꩻတွမ်ႏတဖြာꩻ ခံထူႏချက် သကျွိုက်ခံစာꩻမုꩻ ထာꩻထီႏစစွဥ်ႏယို တပီဗွိုန်တဝ်းဝင်ꩻလဲ့ အဝ်ႏတပီဗွိုန်တဝ်း အခေႏနေႏနဝ်ꩻကိုအခါႏ အမျာꩻအတာႏ နီခွိုꩻအတာႏ အကျိုꩻဖေႏကထွာ ဆွန်ဝင်ꩻစူမာꩻလွေꩻမꩻ ဟဲ့ꩻဖန်လꩻလွောင်ႏဗူႏမုꩻ။
နဝ်ꩻတွော့ꩻ ဖေႏကလွောင်ႏဗူႏအီအတာႏ အရေꩻတန်သွတ်ꩻနဝ်ꩻ နီလိုꩻအမျာꩻခါႏကို
ဖြောင်ဖြောင်ဒေါင်ဒေါင် သွုပ်သံႏဒေါ့ꩻရီဝင်ꩻနဝ်ꩻထွာအခေႏခံႏ။
အချင်ꩻချင်ꩻအလောင်း အွဥ်ႏထာꩻယွုမ်းအံႏတွမ်ႏ သꩻသေနာႏဝင်ꩻ တပြက်ꩻသားကဒေါ့ꩻငဝ်းယိုမဥ်ႏနာႏလွေꩻဖေႏနဝ်ꩻ ထွာအီအဆုံးယော့သွတ်ꩻ လွောင်ႏဗူႏမုꩻ။
အမျာꩻရေႏမိုးချက် လိုꩻမျိုꩻစွိုးခွိုꩻရေႏမိုးချက်ယို မဥ်ႏအွဥ်ႏရေꩻပီပီဝင်ꩻနဝ်ꩻ အမျာꩻအခါႏ သꩻသေနာႏဝင်ꩻလဲ့အီႏထွာပိုႏလွဥ်
သꩻမဲဥ်လွောင်ႏဗူႏယို ပေါႏလွဥ်။
ရီခရာႏနဝ်ꩻ မဥ်ႏလွောင်ႏဗူႏထွူ အကျိုꩻတရာꩻအဝ်ႏပွုံႏပွိုင်နုဲင်းမုဲင်ꩻ…??
ဖြေႏသျင်ꩻအီပျဿနာႏအတာႏ စွန်ꩻအာႏတလာတန်လွဥ်။
အဝ်ႏခန်းစွဥ်းအယပ်ꩻအခုဲင်ႏခါႏကိုလဲ ထူႏတွမ်ႏလွောင်ႏဗူႏအာႏ ဖြေႏသျင်ꩻအီတွော့ꩻ နီပြေင်လောင်းကအဝ်ႏဒါႏ ဝွန်ႏထွူႏဖုံႏ ယွမ်ꩻထိုꩻ လꩻလွဥ်အီသꩻခံႏစာꩻမုꩻအပွိုင်ယိုစား။
ထဲင်းတဗာႏနဝ်ꩻ နီနမ်းလုမ်းဗဥ်ႏရေꩻအတာႏ အုံဗာႏ သꩻတခြင်ခြင်၊ နားဟွိုန်ꩻစုတွမ်ႏ အသောင်အရင်ꩻ (တဝ်းလဲ့) အစွိုꩻအဗူႏတဗာႏကို မဥ်ႏလွောင်ႏဗူႏနဝ်ꩻ အာႏကွိုꩻအုံနောင်ချာငါဝင်ꩻလꩻ။
လွောင်ႏဗူႏမုꩻအာႏတလာဒါႏအစွိုꩻဖုံႏယို အောင်ႏမျင်ႏမုꩻတန်တန်ထိုထို ကလꩻဖိုလဲဥ်းအကျောင်ꩻ သမဲင်ꩻကိုလဲ့အဝ်ႏထီႏသေထွꩻနွောင်ꩻဒျာႏ။
အဝ်ႏထွူလဲဥ်းဒါႏ စွန်ꩻအာႏဖုံႏ ဖေႏကတလာ ယမ်ကတဥ်ႏခွေါင်ထဲင်းထဲင်းအတာႏ လွောင်ႏဗူႏအာႏယို ထွာသော် ထွာအရင်ꩻခံႏအကျောင်ꩻတရာꩻ။
နီဖဝ၊ နီနားဟွိုန်ꩻစု၊ နီလိုꩻမျိုꩻ၊ နီအစွိုꩻအဗူႏတွမ်ႏ နီအသောင်အရင်ꩻအတာႏ စွန်ꩻအာႏဗွေဗွေ မဥ်ႏမဲဥ်ဖန်ဆင်ꩻနဝ်ꩻ လွောင်ႏဗူႏမုꩻကရိုꩻဒါႏ တန်ႏဖိုꩻယို ဟဝ်သေနာႏ ဟဝ်အွဥ်ႏရေꩻငါႏအကျောင်ꩻ။
