မဟာချိုင်ခရဲင်ႏကို ကထန်ႏထိုꩻဒါႏ ကမ္ဘောဒီးယားထာꩻမာꩻသားခြောင်ꩻ အီႏထဲမ်သော့ꩻလွေꩻလုဲင်ႏ မန်းခမ်းထာꩻမာꩻသားအကျောင်ꩻ

ဩဂုတ်လာ ၅ နီꩻ၊ ၂၀၂၅၊ ထုဲင်ꩻ
ထုဲင်ꩻတွမ်ႏကမ္ဘောဒီးယား ကွပ်စွဥ်ႏ ထွာလွေꩻခမ်းကူပျဿနာႏ တွိုက်ꩻပွယ်ꩻတဲင်ꩻ စမွန်စခွန် မဟာချိုင်ခရဲင်ႏကို ကအောဝ်ႏဒါႏ ကမ္ဘောဒီးယားထာꩻမာꩻသားဖုံႏယို သဲင်ꩻချာထိုꩻဗာႏဝွေꩻသီးခမ်းနောဝ်ꩻမꩻ ယိုခါ ထုဲင်ꩻထာꩻမာꩻဗွေႏ(လုင်ငန်းရှင်) အောဝ်ႏမော့ꩻလွေꩻ အယပ်ꩻအခုဲင်ႏနောဝ်ꩻသွူ။

ကောပ်နောဝ်ꩻမꩻ ထာꩻမာꩻဖုံႏ ဖေႏကဗန်တသွိုး ကဆွိုးဗာႏပုဲင်ႏအတာႏ ရေႏမိုးနုဲင်းနောဝ်ꩻတဲင် ဇူလိုင်လာ ၃၁ နီꩻကိုနောဝ်ꩻ မဟာချိုင်ခရဲင်ႏကို ကအောဝ်ႏဒါႏ ထာꩻမာꩻသားအစွိုꩻဖုံႏတွမ်ႏ ထုဲင်ꩻထာꩻမာꩻဗွေႏ(လုပ်ငန်းရှင်)သားဖုံႏ မော့ꩻခွဲဝင်ꩻတဲင် မဟာချိုင်ခရဲင်ႏကို ကထန်ႏထိုꩻဒါႏ ကမ္ဘောဒီးယားထာꩻမာꩻသားခင်ႏလမ်း(ခြောင်ꩻ)ကို အီႏထဲမ်သော့ꩻလွေꩻတောမ်ႏမန်းခမ်းထာꩻမာꩻသားဖုံႏအကျောင်ꩻ ထုဲင်ꩻမီဒီယာ Naewna(နဲဝါ) နောဝ်ꩻ အောဝ်ႏတဲမ်းလွေꩻနုဲင်းနောဝ်ꩻသွူ။

ကွပ်နောဝ်ꩻမꩻ ထုဲင်ꩻခမ်းကို ကအောဝ်ႏဒါႏ မန်းခမ်းထာꩻမာꩻသားအနေႏ မတ်တောင်ꩻခရာႏအမုဲင်လိတ်စေးလာႏ(အထောက်အထား အချက်အလက်) ပြဲ့ꩻပြဲ့ꩻစုမ်ႏစုမ်ႏ ဟောဝ်အောဝ်ႏသေꩻခါꩻငါႏအကျောင်ꩻ မန်းခမ်းထာꩻမာꩻသားရုဲင်ꩻတသွိုးဖေႏအစွိုꩻနောဝ်ꩻ ဖေႏသတိလွေꩻ နေးနောဝ်ꩻသွူ။